اسلا م آباد (۱۴ دسمبر، ۲۰۱۶ء) __ امریکہ نے وفاق کے زیر انتظام قبائلی علاقوں (فاٹا) کے علاقے شمالی وزیرستان ایجنسی میں کیتو بند منصوبے کی تعمیر کے لئے واٹر اینڈ پاور ڈیولپمنٹ اتھارٹی (واپڈا) کو ساڑھے آٹھ ارب روپے فراہم کرنے کے معاہدے پر دستخط کردیے۔ امریکی ادارہ برائے بین الاقوامی ترقی (یو ایس ایڈ) اور واپڈا نے آج یہاں ایک تقریب میں اس معاہدے پر دستخط کئے۔ پاکستان میں تعینات امریکی سفیر ڈیوڈ ہیل اور وفاقی وزیر برائے پانی و بجلی جناب خواجہ آصف نے بھی تقریب میں شرکت کی۔
امریکی سفیر ڈیوڈ ہیل نے اپنے خطاب میں کہا کہ امریکہ اور پاکستان کے درمیان توانائی کے شعبے میں تعاون کی ایک طویل تاریخ ہے۔ آج جس معاہدے پر دستخط کئے گئے ہیں اس سے پاکستان کی توانائی کی ضروریات پوری کرنے اور لاکھوں پاکستانیوں کی زندگی میں بہتری کے مشترکہ اقدامات کو تقویت ملتی ہے۔
کیتو بند کرم تنگی ڈیم منصوبے کا پہلا مرحلہ ہے۔ کرم تنگی ڈیم منصوبے کے پہلے مرحلے کی تعمیر کی تکمیل سے سولہ ہزار ایکڑ سے زائد زرعی اراضی سیراب ہو سکےگی اور اٹھارہ میگاواٹ اضافی بجلی پیدا ہوگی، جس سے ایک لاکھ پاکستانی مستفید ہوں گے۔ کرم تنگی ڈیم منصوبے کے پہلے مرحلے کے تحت دریائے کیتو پر بند، شیرٹالا اور اسپیراگا نہروں، دو بجلی گھروں اورایک ٹرانسمیشن لائن، تعمیراتی اور آپریشنل اسٹاف کے لئے رہائشی سہولتوں اور ڈیم کی تعمیر اور اسے چلانے کی سرگرمیوں کے لئے ایک دفتر کی تعمیر میں اعانت کے لئے واپڈا کو فنڈز منتقل کئے جائیں گے۔
۲۰۰۹ء سے اب تک امریکی حکومت نے پاکستان کے بجلی کے شعبے کو ترقی دینے کے لئے ۵۳ ارب روپے سے زائد کی سرمایہ کاری کی ہے، جس سے دو کروڑ اسی لاکھ پاکستانی مستفید ہوئے ہیں اور نیشنل گرڈ میں دو ہزار چار سو سے زائد میگاواٹ بجلی کا اضافہ ہوا ہے۔ اس مجموعے میں نئے اور بحال شدہ ڈیموں اور تھرمل بجلی گھروں سے ۱۰۱۳ میگاواٹ اور بجلی کی ترسیل و تقسیم کے نظام میں بہتری سے حاصل ہونے والی ۱۴۴۷ میگاواٹ بجلی شامل ہے۔
پاکستان کے توانائی کے شعبے میں امریکی معاونت کے بارے میں مزید معلومات کے لئے درج ذیل لنک ملاحظہ کیجئے۔
https://www.usaid.gov/pakistan/energy
###
