اسلام آباد(۱۸ نومبر ۲۰۲۱ء )۔۔ امریکہ کی حکومت امریکی ادارہ برائے بین الاقوامی ترقی (یو ایس ایڈ) کے توسط سے ۷۰ لاکھ ڈالر کے عطیات پاکستان میں کورونا وائرس کے ثانوی اثرات کے سَدِباب کے لیے جاری ایشیائی ترقیاتی بینک (اے ڈی بی) کے منصوبے میں شامل کر ے گی۔
اس حوالہ سے اسلام آباد میں معاہدہ پر دستخط کرنے کی تقریب منعقد ہوئی، جس میں یو ایس ایڈ کی مِشن ڈائریکٹر جُولی کوئنین اور ایشیائی ترقیاتی بینک کے کنٹری ڈائریکٹر یونگ یی نے شرکت کی۔ تفصیلات کے مطابق یوایس ایڈ کی جانب سے دیے جانے والے ۷۰ لاکھ ڈالر کے عطیات ایشیائی ترقیاتی بینک پاکستان میں کورونا وبا کی وجہ سے متاثر ہونے والے خاندانوں میں بطور نقد امداد فراہم کرنے کے لیے استعمال کرے گا۔ یہ امداد حکومتِ پاکستان کے بینظیر انکم سپورٹ فنڈ پروگرام کے زیر انتظام فعال احساس ایمرجنسی کیش پروگرام کے تحت تقسیم کی جائے گی۔ مزید برآں یو ایس ایڈ کی اعانت مستحقین کے لیے کفالت پروگرام کی کارکردگی ، احتساب اور شفافیت کو یقینی بنانے کے لیے تکنیکی اور انتظامی معاونت بھی فراہم کرے گی ۔
تقریب سے خطاب کرتے ہوئے یو ایس ایڈ کی مشن ڈائریکٹر جُولی کوئنین نے کہا کہ کورونا وبا کے خلا ف جدوجہد میں وسائل کی وسیع تر دستیابی اور اُس کے ساتھ ساتھ مختلف حکومتوں، سول سوسائٹی، نجی شعبہ ہائے جات، مُخیر تنظیموں، کثیر الجہتی اداروں اور دیگر بین الاقوامی شراکت داروں کے درمیان ہنگامی بنیادوں پر اجتماعی کوششوں کی ضرورت ہے۔ انہوں نے کہا کہ یو ایس ایڈ کی جانب سے اےڈی بی کو دیے جانے والے عطیات کورونا وبا کے دوران کاروبار کی بندش اور بیروزگاری کا شکار ہونے والے کم مراعت یافتہ طبقہ سے تعلق رکھنے والے پاکستانی خاندانوں کو حکومت ِپاکستان کے احساس پروگرام کے تحت براہ راست نقد معاونت فراہم کرنے کے لیے خرچ ہوں گے۔
واضح رہے کہ ۷۰ لاکھ ڈالر کے مذکورہ عطیات امریکہ کی حکومت کی جانب سے کووڈ-۱۹ سے متاثرہ مُمالک کی معاونت کے عزم کے تحت کی جانے والی مجموعی کوششوں کا حصہ ہیں ۔ ریاستہائے متحدہ امریکہ نے پاکستان کی حکومت کے ساتھ تعاون میں چھ کروڑ تیس لاکھ ڈالر کی معاونت کووڈ۔۱۹ سے نمٹنے کے لیے فراہم کر چُکا ہے۔ وبا کی شروعات سے ہی امریکہ نے بیماری کی روک تھام اوراُس پر قابو پانے ، مریضوں کی دیکھ بھال کی کوششوں میں بہتری ، لیبارٹری تشخیص میں وُسعت اور صَفِ اوّل کے صحت کارکنوں کی معاونت کے اقدامات میں پاکستان کے ساتھ تعاون کیا ہے۔
پاکستان میں یو ایس ایڈ کے امدادی پروگراموں کے بارے میں مزید معلومات کے لیے براہ مہربانی مندرجہ ذیل لنک ملاحظہ کریں:
