اسلا م آباد (۹ دسمبر، ۲۰۱۶ء) __ امریکہ کی اعانت سے چلنے والے گومل زام ڈیم کمانڈ ایریا ڈیولپمنٹ پروجیکٹ کی حال ہی میں تعمیر کی جانے والی نہروں کا صوبہ خیبرپختونخواہ کے ضلع ڈیرہ اسمٰعیل خان میں افتتاح کیا گیا۔ امریکی ادارہ برائے بین الاقوامی ترقی (یو ایس ایڈ) نے گومل زام ڈیم کمانڈ ایریا ڈیولپمنٹ پروجیکٹ کیلئے دو کروڑ بائیس لاکھ بیس ہزار ڈالر فراہم کرنے کی غرض سے مارچ ۲۰۱۵ء میں خیبرپختونخواہ حکومت کے ساتھ ایک معاہدے پر دستخط کئے تھے۔
یو ایس ایڈ کے مشن ڈائریکٹر جان گرورک نے کہا کہ آبپاشی کی ان نہروں سے بڑے پیمانے پر روزگار کے مواقع مہیا ہوں گے۔ اس علاقے میں پانی کی دستیابی سے کمانڈ ایریا کی مربوط ترقی کوفروغ حاصل ہو گا۔ انہوں نے کہا کہ کاشتکاروں کو کھیتوں کیلئے پانی کے بہتر انتظام ، پیداواری صلاحیت میں اضافے، ویلیو ایڈیشن، پروسیسنگ اور مؤثر مارکیٹنگ کیلئے تربیت بھی فراہم کی جائے گی۔
اس منصوبے کے پہلے مرحلے کا آغاز ۲۰۱۵ء میں کیا گیا تھا جو اس کی بنیادی اہمیت کے تعین اور قابل عمل ہونے کی تشخیص، کمانڈ ایریا کی ترقی کیلئے ماسٹر پلان کی تیاری، پانی کے استعمال کنندگان کی انجمنوں کے قیام،زرعی پیداوار کی صلاحیت میں بہتری کیلئے کاشتکاروں کی تربیت اور فصلوں، پھلوں، سبزیوں اور مویشیوں سے متعلق پروسیسنگ اور مارکیٹنگ پر مشتمل تھا۔ منصوبے کے دوسرے مرحلے میں مختلف تعمیری سرگرمیاں شامل تھیں، جن میں ٹانک اور ڈیرہ اسمٰعیل خان کے اضلاع میں ۳۹۳ پختہ نہریں، زمین کو ہموار کرنا، ذخیرہ آب کے تالاب اور ڈرپ اور آبپاشی کا اسپرنکل طریقہ متعارف کروانا شامل ہے۔
توقع ہے کہ اس منصوبے سے ، جو ستمبر ۲۰۱۸ء میں مکمل ہوگا،تقریباً ۳۰۰۰۰ خاندان براہ راست مستفید ہوں گے۔ یو ایس ایڈ کی معاشی ترقی اور زرعی سرگرمیوں سے متعلق مزید معلومات کیلئے درج ذیل لنک ملاحظہ کیجئے:
