اسلام آباد ( ۲۴ ِ ستمبر ۲۰۱۸ ء ) – سفیر پال جونز نے آج امریکی سفارتخانہ میں بطور قائم مقام سفیر اپنی ذمہ داری سنبھال لی ہے ۔ سفیر جونز پاکستان میں متعین امریکی مشن کی جانب سے پاکستانی اور امریکی عوام کے مابین تعلقات کو مزید گہرا بنانے کے لئے جاری کوششوں کی قیادت کریں گے اور پاکستان کی نئی حکومت کے ساتھ مل کر ملک کے مستحکم، محفوظ اور خوشحال مستقبل کے لئے کام کریں گے۔ اس مشترکہ کوشش کو کامیابی سے ہمکنار کرنے اورپاکستان میں امریکی مشن کی رہنمائی کے لئے سفیر پال جونز پیشہ ورانہ تجربہ اور سفارتی صلاحیتوں سے مالامال ہیں۔ سفیر جونز نے پاکستان پہنچنے کے بعد اظہار خیال کرتے ہوئے کہا کہ اُنہیں پاکستان واپس آ کر بے انتہا خوشی ہوئی ہے اور وہ خود کو ملک کے گرم جوش اور مہمان نواز لوگوں، خوبصورت نظاروں اور لذیذ کھانوں سے دوبارہ آشنا کرنے کے منتظر ہیں۔
سفیر پال جونز امریکی محکمہ خارجہ کی سینئر فارن سروس کے کیریئر ممبر ہیں۔ انہوں نے پولینڈ میں ۲۰۱۵ ء سے ۲۰۱۸ء تک بطور سفیر خدمات سرانجام دیں ہی۔ قبل ازیں انہوں نے بطور پرنسپل نائب معاون وزیر خارجہ برائے یورپ اور یورو۔ایشیائی امور ( ۲۰۱۳ء سے ۲۰۱۵ء ) ، ملائیشیا میں بطور امریکی سفیر ( ۲۰۱۰ ء سے ۲۰۱۳ ء تک ) ، بیک وقت نائب امریکی خصوصی ایلچی برائے افغانستان و پاکستان اور نائب معاون وزیر خارجہ برائے جنوب ایشیائی امور ( ۲۰۰۹ ء سے ۲۰۱۰ ء ) کی ذمہ داریاں نبھائیں۔ وہ منیلا ، فلپائن میں امریکی سفارتخانہ، ادارہ برائے یورپی سلامتی وتعاون ( اوسی ای ) میں امریکی مشن اور اسکوپجی، مقدونیہ میں امریکی سفارتخانہ میں نائب سفیر کے فرائض بھی نبھاچکے ہیں۔
ان کے اعزازات میں صدارتی ایوارڈ برائے اعلیٰ خدمات، رابرٹ سی فریشیوئر میموریل ایوارڈ برائے قیامِ امن اور متعدد سپیرئرآنر ایوارڈ زشامل ہیں۔ وہ ہسپانوی، روسی اور تھوڑی بہت پولش زبان بولتے ہیں۔ انہوں نے کارنیل یونیورسٹی سے گریجویشن اور یونیورسٹی آف ورجینیا اور نیول وار کالج سے ماسٹرز کی ڈگریاں حاصل کیں۔ وہ ایوارڈ یافتہ اور فری لانس مصنفہ کیتھرین جونز سے رشتہ ازدواج میں منسلک ہیں ۔ اُن کے دو بچے ایلکسنڈرا اور ہیل ہیں۔
