کراچی: امریکی قونصل جنرل گریس شیلٹن نے اولڈ قونصل جنرل رہائش گاہ پر اسپیشل اولمپکس پاکستان کے عہدے داروں، کھلاڑیوں اور طلبہ کا استقبال کیا۔ یہ اس سال امریکی قونصلیٹ کا مسلسل تیسرا اسپورٹس ڈپلومیسی ایونٹ تھا۔
قونصل جنرل گریس شیلٹن، اسپیشل اولمپکس پاکستان کے سیکریٹری جنرل رضوان منصور، مینیجر آپریشنز اینڈ آرگنائزیشنل ڈیولپمنٹ دانیال علوی نے ایونٹ کی صدارت کی۔ ایونٹ میں 50 اسپیشل ایتھلیٹ اور 30 طلبہ نے بوچی، باسکٹ بال اور 25 میٹر "سہارے سے چلنے” کی دوڑ میں حصہ لیا۔
قونصل جنرل گریس شیلٹن نے شرکا سے خطاب کرتے ہوئے کہا کہ ” مختلف صلاحیتوں اور مہارتوں کے حامل طلبہ کا ایک مشترکہ مقصد کے حصول کے لیے سخت جدوجہد کرنا قابل تعریف ہے۔ ان کی یہ کوشش یہ ثابت کرتی ہے کہ اگر ہم مل کر کام کریں اور مشترکہ اہداف کے حصول کے لیے کوشش کریں تو بہت کچھ ممکن ہے۔”
اسپیشل اولمپکس کی بنیاد 1950ء میں امریکی صدر جان ایف کینیڈی کی ہمشیرہ یونس کینیڈی شرائیور نے رکھی تھی جب انھوں نے دیکھا تھا کہ ذہنی معذوری میں مبتلا افراد سے کس قدر نامناسب اور غیرمنصفانہ سلوک کیا جاتا ہے۔ پہلے انٹرنیشنل اسپیشل اولمپکس کا انعقاد 1968ء میں شکاگو میں ہوا جس کے بعد سے دنیا بھر میں اس کے ایک لاکھ سے زائد ایونٹ ہوچکے ہیں
