اسلا م آباد (۷ ِنومبر ۲۰۱۸ء) __ امریکی پرنسپل نائب معاون وزیر خارجہ برائے جنوب و وسط ایشیائی امور،سفیر ایلس ویلز نےچھ سے سات نومبر تک اسلام آباد کا دورہ کیا، جس کا مقصد جنیوا میں منعقد ہونے والی افغانستان کانفرنس کے انتظامات اور افغان امن عمل کی پیشرفت کے لئے کی جانے والی مشترکہ کوششوں سمیت باہمی ایجنڈے پر موجود کلیدی امور کا جائزہ لینا تھا۔
سفیر ویلز نے وزیر خزانہ اسد عمر ، وزارت خارجہ اور وزارت داخلہ کے سینئر حکام اورڈائریکٹر جنرل ملٹری آپریشنز نعمان زکریا سے ملاقاتیں کیں۔ اس موقع پر سفیر ویلز نے وزرائے خارجہ پومپیو اور شاہ محمود قریشی کے نصب العین کا اعادہ کیا کہ دونوں ممالک کے درمیان اعتماد پر مبنی باہمی مفاد کے تعلقات قائم کئے جائیں گے۔سفیر ویلز نے جنوبی ایشیا میں سلامتی، استحکام اور تعاون کے فروغ کے لئے تمام فریقوں کے کردار کی اہمیت کو اجاگر کرتے ہوئے اس مقصد کے حصول کے لئے پاکستانی حکام کے عزم وارادےکو خوش آئند قرار دیا۔ سفیر ویلز نے امریکہ اور پاکستان کےمابین تجارتی اور اقتصادی تعلقات کے قیام کے مواقع اور دو طرفہ تعلقات میں ترقی کی نئی راہیں تلاش کرنے کے بارے میں بھی تبادلہ خیال کیا ۔
سفیر ویلز نے تھنک ٹینک کے نمائندوں ، علاقائی سلامتی کے ماہرین اور سول سوسائٹی کے ارکان سے بھی ملاقاتیں کیں۔ انہوں نے امریکی اور پاکستانی عوام کے مشترکہ مفادات کی تکمیل کے لئے امریکی عزم کو اجاگر کیا۔
