اسلام آباد ( ۷ فروری ۲۰۲۲ء)—پاکستان میں امریکی سفارتی مشن کو یہ اعلان کرتے ہوئے خوشی محسوس ہو رہی ہے کہ امریکی سفارتخانہ اسلام آباد اور امریکی قونصل خانہ کراچی میں انٹرویو کی شرط سے چُھوٹ کے لیے امریکہ کے ” بی ون بی ٹو” سیاحتی اور کاروباری ویزا کی تجدید کے لیے پاکستانیوں کی اہلیت میں مزید توسیع کر دی گئی ہے۔ ساٹھ سال سے زیادہ عمر کے وہ پاکستانی شہری، جن کے پاس امریکہ کا درست اور قابل قبول بی ون بی ٹو ویزا موجود ہے یا اُس ویزے کی مدت گزشتہ ۴۸ مہینوں کے دوران ختم ہو گئی ہے تو وہ اس پروگرام میں شرکت کے لیے اہل ہیں۔ اس انتظامی تبدیلی سے صارفین کے لیے خدمات کی فراہمی میں بہتری اور اہل پاکستانی شہریوں کے سیاحتی اور کاروباری ویزوں کی تجدید کے عمل میں بھی تیزی واقع ہو گی۔
اس سلسلہ میں ممکنہ طور پر اہل درخواست گزار ، جن کے انٹرویو کی تاریخیں پہلے ہی سے طے شدہ تھیں، اُن سے براہ راست رابطہ کر کے مطلع کیا گیا ہے کہ وہ اپنی درخواستیں نئی سہولت کے تحت جمع کروا سکتے ہیں۔ براہ مہربانی واضح رہے کہ ویزا رکھنے والے بعض اہل شہریوں کو امریکی قانون کے تقاضوں کے تحت امریکی سفارتخانہ یا قونصل خانے میں انٹرویو کے لیے پیش ہونا پڑ سکتا ہے ۔
اپنی اہلیت کی جانچ پڑتا ل کے لیے درخواست گزار مندرجہ ذیل ویب سائٹ ملاحظہ کر سکتے ہیں :
https://www.ustraveldocs.com/pk/pk-niv-visarenew.asp
نیز اپنے سوالات کے تفصیلی جوابات کے لیےنیچے دی گئی ویب سائٹ پر جائیں:
https://www.ustraveldocs.com/pk/pk-gen-faq.asp.
###
