اسلام آباد ( ۲۶ ِنومبر، ۲۰۱۶ ء ) __ امریکی مصنفہ اور آرٹ کیوریٹر وکی کلارک نے ۱۵ سے ۲۵ نومبر تک لاہور اور اسلام آباد کا دورہ کیا جس میں انہوں نے پاکستانی مصوروں، اساتذہ اور طلباء کے ساتھ پاکستانی فن ِمصوری کی روایات کے بارے میں تبادلہ خیال کیا۔
امریکی سفارتخانہ نے "کچھ خاص سینٹر فار آرٹس، کلچر اینڈ ڈائیلاگ” کے تعاون سے بیکن ہاؤس سکول، کومسیٹس یونیورسٹی، اقراء یونیورسٹی اور نیشنل کالج آف آرٹس میں ڈاکٹر وکی کلارک کے لیکچرز اور مقامی مصوروں کے ساتھ ملاقات کا اہتمام کیا ۔
"کچھ خاص "کی چیف ایگزیکٹو آفیسر مشیل تانیہ بٹ نے کہا کہ کچھ خاص آرٹ کے ساتھ اپنے لگاؤ اور ثقافتی تبادلوں کے ذریعے فاصلوں کو کم کرنے کے عزم کے حوالے سے اپنی خاص پہچان رکھتا ہے۔ انہوں نے کہا کہ فنکارانہ تبادلوں اور تعلقات کے فروغ کے ذریعے معاشرتی فلاح اور مختلف ثقافتوں کی جان پہچان میں اضافے سے مشترکہ عالمی عصری تجربے میں بہتری اُن کے ادارے کی اقدار میں شامل ہے۔ مشیل تانیہ بٹ نے آرٹ کےعلم اور جوش وجذبہ سے متعلق طلباوطالبات اور مصوروں کوآگاہ کرنے پر ڈاکٹر وکی کلارک کا شکریہ ادا کیا اور توقع ظاہر کی کہ اس ثقافتی تبادلے سے آرٹ سے وابستہ پاکستانی اور امریکی افراد اور اداروں کے درمیان تعاون کی نئی راہیں کھلیں گی۔
ڈاکٹر کلارک نے ۱۸ ِنومبر کو پاکستان نیشنل کونسل آف دی آرٹس میں امریکی سفارتخانہ کی مالی اعانت سے منعقد ہو نیوالی پاکستانی مصوری کی نمائش کی افتتاحی تقریب میں بھی شرکت کی ۔
ڈاکٹر کلارک نے کہا کہ وہ اتنے با صلا حیت اور متاثر کُن پاکستانی مصوروں اورطلبا وطالبات سے ملاقات پر انتہائی مشکور ہیں۔ انہوں نے کہا کہ اسلام آباد اور لاہور میں اپنی ملاقاتوں سے وہ آرٹ کے نت نئے تصورات اور روایات سے متعارف ہوئی ہیں۔ تبادلے کے اس نوعیت کے پروگرام مستقبل میں تعاون ، خیالات اور آرٹ کے تبادلوں کے مواقع فراہم کرتے ہیں ۔
امریکی سفارتخانہ پاکستان میں فنون لطیفہ کے پروگراموں کی مالی اعانت جاری رکھنے کے عزم پر قائم ہے کیونکہ فنون کے تبادلے تعاون، تعلیم اور نئے خیالات کے ذریعے دونوں ملکوں کی فنی روایات کو جِلابخشتے ہیں۔
پاکستان میں امریکی سفارتخانہ کی سرگرمیوں سے متعلق مزید جاننے کے لیے براہِ مہربانی درج ذیل ویب سائیٹ ملاحظہ کیجیئے۔
۲۶ ِنومبر، ۲۰۱۶ رابطہ: شعبہ امور عامہ
برا ئے فوری اجراء سفارتخانہ ریاست ہائے متحدہ امریکہ
۱۰۰/۲۰۱۶ء فون:۰۵۱۲۰۱۵۴۲۷، ۰۵۱۲۰۱۴۴۲۳
