13 نومبر 2018ء
رابطہ: کرش داس
فون نمبر: 35275000-021
برائے فوری اجرا
سندھ میں ترقیاتی منصوبوں کے لیے امریکی حکومت کی مسلسل معاونت جاری
کراچی: امریکی قونصل جنرل جو این ویگنر اور عالمی برادری کےنمائنددوں نے سندھ حکومت کے محکمہ منصوبہ بندی و ترقی کی جانب سے منعقدہ تقریب میں شرکت کی جس میں سندھ ڈیولپمنٹ فورم (SDF) کی رپورٹ کا اجرا کیا گیا۔
امریکی ایجنسی برائے بین الاقوامی ترقی (USAID) کی فعال شمولیت اور مالی امداد کے ذریعے محکمہ تعلیم و منصوبہ بندی سندھ نے 28 مارچ 2018 کو کراچی میں ایس ڈیف کا آغاز کیا تھا۔ اس سلسلے میں عطیات دینے والے نمایاں عالمی اداروں میں ورلڈ بینک، ایشین ڈیولپمنٹ بینک، اقوام متحدہ، یورپی یونین اور جاپان انٹرنیشنل کوآپریشن ایجنسی شامل ہیں۔ کانفرنس کے دوران شرکا نے ایسے 9 ترقیاتی شعبوں کے متعلق تبادلہ خیال کیا جو ترجیحاتی شعبوں میں سفارشات کی بنیاد فراہم کرتے ہیں۔ ان ترجیحاتی شعبوں میں زراعت، معاشی ترقی، تعلیم، توانائی اور انفرااسٹرکچر، آبادی و صحت، غذائیت، عوامی مالیاتی تنظیم، غربت کا خاتمہ اور فراہمی و نکاسی آب شامل ہیں۔
ایس ڈی ایف ترقیاتی پالیسی کی تشکیل اور ترجیحات کے تعین کے لیے سندھ حکومت، نجی شعبے اور عالمی ترقیاتی اداروں کے درمیان تبادلہ خیال کے لیے قائم کیا گیا ہے۔ ایس ڈی ایف کی حتمی رپورٹ کی سفارشات سندھ حکومت کے لیے پالیسیاں مرتب کرنے، ترقیاتی پروگراموں اور بجٹ میں ترجیحات طے کرنے میں کارآمد ثابت ہوں گی۔
امریکی ایجنسی برائے بین الاقوامی ترقی (USAID) کے ڈپٹی مشن ڈائریکٹر برائے سندھ و بلوچستان جون اسمتھ سرین نے بھی رپورٹ کے اجرا کی تقریب میں شرکت کی۔ یوایس ایڈ نے سندھ میں کئی اہم منصوبوں میں معاونت فراہم کی ہے جن میں سندھ بیسک ایجوکیشن پروگرام، جیکب آباد میں میونسپل سروس پروگرام، سندھ حکومت کے اشتراک سے جلد شروع کیا جانے والا ہیلتھ کیپیسٹی بلڈنگ پروگرام اور ان کے علاوہ صحت، تعلیم، توانائی، روزگار، برادریوں کو مستحکم بنانے اور معاشی ترقی کے مختلف پروگرام شامل ہیں۔ سندھ کا محکمہ منصوبہ بندی و ترقی صوبے میں غیرملکی معاونت سے چلنے والے منصوبوں سمیت تمام ترقیاتی پروگراموں کے لیے نگرانی اور مدد کا فریضہ انجام دیتا ہے۔
سندھ ڈیولپمنٹ فورم کی رپورٹ یوایس ایڈ کی جانب سے مرتب کی گئی اور محکمہ منصوبہ بندی و ترقی کے چیئرمین محمد وسیم کو پیش کی گئی۔ یہ تقریب حتمی رپورٹ کی تکیمل اور وزیراعلیٰ سندھ سید مراد علی شاہ کی جانب سے اسے قبول کیے جانے کی عکاس تھی۔
پاکستان میں یو ایس ایڈ کے پروگراموں کے بارے میں مزید جاننے کے لیے یہ ویب سائٹ ملاحظہ کیجیے۔ www.usaid.gov/Pakistan
