سندھ پولیس کی استعداد بڑھانے کے لیے امریکی حکومت کی جانب سے ”فائر آرمز سیمیولیٹرز” کی فراہمی
کراچی: 12 دسمبر 2018ء کو سعید آباد پولیس ٹریننگ سینٹر کو 38 کروڑ 70 لاکھ (27 لاکھ ڈالر) سے زائد کے اسلحے کے سیمیولیٹر فراہم کیے گئے جس کا مقصد پولیس اہلکاروں کو اسلحہ چلانے کی محفوظ اور مناسب تربیت دینے کے لیے ادارے کی گنجائش اور استعداد بڑھانا ہے۔ یہ عطیہ یوایس مشن پاکستان کی جانب سے دیا گیا ہے۔
امریکی حکومت کا سندھ حکومت سے تعاون 2012ء سے جاری ہے جس کے تحت اب تک ڈھائی کروڑ ڈالر سے زائد کا سازوسامان اور 50 ہزار سے زائد پولیس اہلکاروں کو تربیت فراہم کی جاچکی ہے۔
افتتاحی تقریب سے خطاب کرتے ہوئے امریکی قونصل جنرل جو این ویگنر نے سندھ پولیس سے مسلسل تعاون کی وجوہات بیان کرتے ہوئے کہا کہ” امریکی حکومت سندھ حکومت کی معاونت کرتی ہے کیونکہ یہاں کی پولیس پاکستان میں پرتشدد انتہاپسندی کے خاتمے اور معاشرے کو مزید محفوظ، مستحکم اور جمہوری بنانے کے لیے اگلے محاذ پر خدمات انجام دے رہی ہے۔
امریکی محکمہ خارجہ کا انٹرنیشنل نارکوٹکس اینڈ لا انفورسمنٹ بیورو90 سے زائد ممالک میں قانون نافذ کرنے والے اداروں کو جرائم اور کرپشن کے خاتمے، منشیات سے متعلقہ جرائم ختم کرنے اور پولیس کی صلاحیتیں بڑھانے میں مدد فراہم کرتا ہے، یہ ادارہ قانون کے نفاذ اور شفاف عدالتی نظام کے لیے بھی کوششیں کرتا ہے۔
آئی این ایل کے بارے میں مزید معلومات کے لیے یہ ویب سائٹ ملاحظہ کیجیے۔ http://www.state.gov/j/inl/
