اسلام آباد ( ۲۲ ِنومبر، ۲۰۱۶ ء ) __ سماعت سے محروم افراد کے لیے قومی ادارہ برائے اسپیشل ایجوکیشن نے امریکی سفارتخانے کے پریس آفیسر نولین جانسن کی میزبانی کی ،جنہوں نے طلباء سےبصارت اور سماعت سے محروم امریکی مدرس، مصنفہ اور سماجی حقوق کی علمبردار خاتون ہیلن کیلر کی قابل تقلید زندگی سے متعلق اظہار خیال کیا۔ ہیلن کیلر نے ۱۹۲۰ ء میں امریکی شہری آزادیوں کی تنظیم کے قیام میں اہم کردار ادا کیا تھا اور اُنہیں ان کی خدمات کے اعتراف میں صدارتی تمغہ برائے آزادی سے نوازاگیا ۔ طلباء نے پاکستان کی فارن سروس میں بصارت سے محروم پہلی خاتون صائمہ سلیم سے متعلق بھی آگاہی حاصل کی ۔
امریکی سفارتکار نولین جانسن نے اپنے خطاب میں طالبعلموں سے کہا کہ انہیں ہمیشہ یاد رکھنا چاہیے کہ اُن کی غیرمعمولی صلاحیتیں ان کی محرومیوں کے مقابلے میں کئی گنا زیادہ ہیں۔
تقریب میں قومی ادارہ برائے اسپیشل ایجوکیشن کی ڈائریکٹر جنرل عشرت مسعود نے کہا کہ ہیلن کیلر کی زندگی سےہمیں یہ سبق ملتا ہے کہ ہم ظاہری رکاوٹوں کے باوجود اپنے خوابوں کو شرمندہ تعبیر کرنے کے لیے ہمت اور جوش و جذبہ سے سرگرم ِعمل رہیں ۔
امریکی سفارتخانہ خصوصی افراد کے حقوق کی حفاظت اور آگاہی کے لیے مختلف سرگرمیوں کی اعانت کر رہا ہے جن میں ہیلن کیلر سینٹر کی اعانت اور حال ہی مکمل ہونیوالے پونے چار لاکھ ڈالر مالیت کے اسپیشل ٹیلنٹ ایکسچینج پروگرام (اسٹیپ) شامل ہیں جس کے تحت معذور خواتین کی مددکی جاتی ہے۔ اسپیشل ٹیلنٹ ایکسچینج پروگرام (اسٹیپ) کے تحت عوامی اور حکومتی سطح پر خواتین اور خصوصی افراد کے حقوق کے متعلق شعور کی بیداری اور معذوری کی شکار خوا تین کو روزگار کی فراہمی کے لیے ۹۰سے زائد تربیتی نشستیں ، ٹیلی وژن مباحثوں اور صوبائی سطح پر ورکشاپس کا انعقاد کیا گیا۔ امریکی سفارتخانہ اور موبیلٹی انٹر نیشنل معذوری کے شکار پاکستانی لوگوں کو با اختیار بنانے کے لیے ایک نئے پروگرام پر بھی کام شروع کر رہے ہیں ۔
۲۲ ِنومبر، ۲۰۱۶ رابطہ: شعبہ امور عامہ
برا ئے فوری اجراء سفارتخانہ ریاست ہائے متحدہ امریکہ
۱۰۰/۲۰۱۶ء فون:۰۵۱۲۰۱۵۴۲۷، ۰۵۱۲۰۱۴۴۲۳
مزید معلومات کے لیے برائے مہربانی درج ذیل ویب سائیٹ ملاحظہ کیجیئے۔
http://www.state.gov/j/drl/sadr/
