اسلا م آباد (۱۴جولائی، ۲۰۱۷ء) __ چھ پاکستانی طلبہ اور ان کے اساتذہ واشنگٹن ڈی سی میں منعقد ہونے والے فرسٹ گلوبل چیلنج روبوٹکس مقابلے میں شرکت کے لئے آج امریکہ روانہ ہوگئے۔ پاکستانی ٹیم جس کے لئے مالی معاونت امریکی سفارتخانہ نے فراہم کی ہے، صاف پانی تک رسائی پر مرکوز انجینئرنگ کے اہداف کے حصول کے لئے دنیا کی دوسری ٹیموں کے ساتھ ملکر کام کرے گی ۔
امریکی سفارتخانہ کے ناظم الامورجوناتھن پریٹ نے پاکستانی ٹیم کی روانگی سے قبل ان سے ملاقات کی اور پاکستانی ٹیم کی اس بات پر حوصلہ افزائی کہ وہ امریکہ اور تقریباً ۱۶۰ دیگر ممالک سے تعلق رکھنے والے اپنے ہم منصبوں کے ساتھ فعال اشتراک کریں۔
انہوں نے امید ظاہر کی کہ پاکستانی طلبہ پاکستان، امریکہ اور دنیا کے دیگر ممالک کو درپیش سب سے بڑے مسائل میں سے بعض کے حل کے لئے روبوٹکس کے استعمال کے حوالے سے اپنے خیالات کا تبادلہ کریں گے ۔
پاکستانی ٹیم کے قائد علی سید نے کہا کہ ان کی ٹیم ‘‘لیٹس انوویٹ’’ کی جانب سے منعقدہ ایک قومی مقابلے میں کامیابی کے بعد پاکستان کی بین الاقوامی سطح پر نمائندگی کی غر ض سے فرسٹ یو ایس اے کے زیر اہتمام منعقد کئے جانے والے اس بین الاقوامی مقابلے میں شرکت کے لئے ہفتوں سے تیاری کررہی ہے۔
انہوں نے کہا کہ ہم اس بین الاقوامی مقابلے میں پاکستان کی نمائندگی کو اپنے لئے اعز ا ز سمجھتے ہیں اور پاکستانی طلبہ روبوٹکس کے ذریعے مسائل کے حل کے لئے جذبہ اور صلاحیت دونوں رکھتے ہیں۔
تصاویر کے لئے امریکی سفارتخانہ کا درج ذیل فلکر پیج ملاحظہ کیجئے۔
