کراچی۔امریکی ادارہ برائے بین الاقوامی ترقی (USAID)اور پاکستان کے پانچ بڑے بینکوں نے ملک میں توانائی کے منصوبوں کیلیے معاہدے پر دستخط کیے۔مفاہمتی یاداشت پر دستخط کی تقریب میں کراچی میں متعین امریکی قونصل جنرل گریس شیلٹن نےبھی شرکت کی۔جن پاکستانی بینکوں نے معاہدے پر دستخط کیے ان میں حبیب بینک لمیٹڈ،مسلم کمرشل بینک لمیٹڈ،فیصل بینک لمیٹڈ،میزان بینک لمیٹڈاور جے ایس بینک لمیٹڈشامل ہیں ۔معاہدے کے تحت USAIDپندرہ سال تک ان بینکوں کے ذریعے صاف توانائی کے منصوبوں کیلیےحاصل کیے جانے والے قرض پر 50فیصد گارنٹی فراہم کرے گا۔
معاہدے پر دستخط کی تقریب سے خطاب کرتے ہوئے USAIDکےپاکستان اور افغانستان کیلیے اسسٹنٹ ایڈمنسٹریٹر ولیم ہیمنک کا کہنا تھا کہ امریکی حکومت پاکستان کے چند بڑے بینکوں کے ساتھ اشتراک اور ان کے ذریعے پاکستان میں صاف توانائی کے منصوبوں کی ترویج پر انتہائی مطمئن ہے۔ان کا کہنا تھا کہ معاہدےکے تحت صاف توانائی کے چھوٹے منصوبوں کیلیے88ملین ڈالر کے مساوی طویل مدتی پاکستانی سرمایہ فراہم کیا جائےگا۔
پاکستان اور امریکا کے درمیان پاک امریکا اسٹرٹیجک ڈائیلاگ کے تحت توانائی کے منصوبوں کیلیےتعاون فراہم کیا جا رہا ہے۔پاکستانی وزیر اعظم نواز شریف اور امریکی صدر باراک اوباما کے درمیان اکتوبر 2015میں ہونے والی ملاقات میں کیےگئے اعلانات تحت پاکستان کو توانائی کی پیداوار،ٹرانسمیشن،ڈسٹری بیوشن، مینجمنٹ ،آمدنی میں اضافےاور پالیسی اصلاحات کیلیے تعاون فراہم کیا جا رہا ہے۔
