امریکی حکومت کے زیر انتظام انگریزی کی تربیت کے منصوبے انگلش ایکسز مائیکرو اسکالر شپ پروگرام (Access) میں حیدرآباد سے تعلق رکھنے والے 200 نئے طلبا کو شامل کرلیا گیا۔ اس موقع پر منعقد ہونے والی تقریب میں کراچی میں متعین امریکی قونصل جنرل برائن ہیتھ، امریکی قونصل خانے کے شعبہ تعلقات عامہ کے سربراہ مارک کینڈرک، ثقافتی اتاشی پریسلہ گوزمین، طلبا، اساتذہ اور والدین کی ایک بڑی تعداد نے شرکت کی۔
تقریب سے خطاب کرتے ہوئے قونصل جنرل برائن ہیتھ نے کہا کہ ’مجھے انگریزی کی تربیت کے اس منصوبے میں مزید طلبا کی شمولیت پر بے انتہا خوشی ہے۔ اس سال پاکستان بھر سے انگلش ایکسز مائیکرو اسکالرشپ پروگرام (Access) میں پانچ ہزار طلبا شرکت کر رہے ہیں۔‘ قونصل جنرل نے مزید کہا کہ ’انگریزی کی تربیت کے اس منصوبے سے نا صرف طلبا اپنی انگریزی کی صلاحیتوں کو بہتر بناتے ہیں بلکہ غیر نصابی سرگرمیوں میں بھی بھر پور حصہ لیتے ہیں۔‘
حیدرآباد میں جاری انگریزی کی تربیت کے اس منصوبے کا باقاعدہ آغاز نومبر 2014 میں ہوا جبکہ سندھ بھر میں اس نوعیت کے دیگر چار منصوبے جاری ہیں۔ تقریب کے آخر میں پاکستان کا دورہ کرنے والی امریکی گلوکارہ میری مک برائڈ نے اپنے فن کا مظاہرہ کیا۔
انگلش ایکسز مائیکرو اسکالرشپ پروگرام (Access) امریکی حکومت کا انتہائی اہم منصوبہ ہے جس کے ذریعے ملک بھر میں ہزاروں بچوں کو اعلیٰ تعلیم کے مواقع فراہم کیے جارہے ہیں۔ پاکستان میں جاری Access پروگرام دنیا بھر میں اپنی نوعیت کا سب سے بڑا منصوبہ ہے۔ اس پروگرام کے تحت کم آمدنی والے علاقوں سے تعلق رکھنے والے 13 سے 17 سال کی عمر کے پانچ ہزار سے زائد پاکستانی طلبا کو انگریزی کی تربیت فراہم کی جارہی ہے۔ یہ طلبا معمول کی کلاسوں کے بعد اور گرمیوں کی تعطیلات میں اپنی انگریزی کی صلاحیتوں کو بہتر بناتے ہیں۔ کورس کی کوئی فیس نہیں جبکہ کتابیں، کاپیاں اور اسکول بیگ مفت فراہم کیے جاتے ہیں۔ 2004 میں شروع ہونے والے اس منصوبے سے 85 ملکوں میں ایک لاکھ سے زائد طلبا فائدہ اٹھا چکے ہیں۔
