امریکی قونصل جنرل برائن ہیتھ کی رہائش گاہ پر بلوچ ثقافتی دن کی تقریب کا اہتمام کیا گیا جس میں نامور بلوچ فنکاروں، کاروباری افراد، صحافیوں اور زندگی کے مختلف شعبوں سے تعلق رکھنے والے افراد نے شرکت کی۔ مشہور بلوچی موسیقاروں تاج محمد بلیدی، شازیہ اور حاجی سلام نے دلفریب بلوچی موسیقی پیش کی۔ محمد اسمعیل نے طبلے، غلام محمد نے بینجو، عنایت حسین نے ڈھولک اور اللہ بخش نے دمبورگ پر ان کا ساتھ دیا۔ اس کے علاوہ امریکی قونصل خانے کے سیاسی افسر رین الہٰی نے سروز پر روایتی بلوچی موسیقی بھی پیش کی۔
تقریب سے خطاب کرتے ہوئے قونصل جنرل برائن ہیتھ کا کہنا تھا کہ ’کراچی میں متعین امریکی قونصل جنرل کی حیثیت سے میں سندھ اور بلوچستان میں اپنی ذمہ داریاں نبھا رہا ہوں۔ بلوچستان کا سفر اکثر ناممکن ہوتا ہے اسی لیے ہماری کوشش ہوتی ہے کہ اس قسم کی تقریبات کے ذریعے بلوچستان کے عوام سے رابطہ بحال رکھا جائے۔‘
قونصل جنرل برائن ہیتھ نے مزید کہا کہ ’پاکستان مختلف ثقافتوں کا حسین امتزاج ہے اور پاکستانی اس پر جتنا فخر کریں کم ہے۔ پاکستان کی طرح امریکا میں بھی مختلف ثقافتوں سے تعلق رکھنے والے افراد بستے ہیں۔ یہ افراد دوسری ثقافتوں اور علاقوں سے تعلق رکھنے والے لوگوں کے ساتھ نا صرف گھل مل کر رہتے ہیں بلکہ ان کی روایات کو بھی اپناتے ہیں۔ اس طرح ایک مضبوط امریکا کی تشکیل میں مدد ملتی ہے۔‘
