اسلام آباد (۳ جولائی ۲۰۲۱ء)۔۔ امریکی سفارتخانہ کے منسٹر قونصلر برائے امور عامہ رے کاسٹیلو نے اکیڈمی آف ویمن انٹرپرینیوئرز (اے ڈبلیو اِی) کی افتتاحی تقریب کے موقع پر ۷۰ سے زیادہ پاکستانی تاجر خواتین شرکاء کا خیر مقدم کیا۔ ذاتی کاروبار کرنے والی خواتین کی رہنمائی کے لیے پاکستان میں قائم ہونے والا یہ اپنی نوعیت کا پہلا تربیتی ادارہ ہے۔ واضح رہے کہ امریکی محکمہ خارجہ کا یہ پروگرام دنیا بھر میں خواتین کو اپنے تجارتی ادارے قائم کرنے میں مدد فراہم کرتا ہے اور پاکستان میں اِس کے افتتاح کا مقصد معیشت میں پاکستانی خواتین کے کردار کی اہمیت اُجاگر کرنا اور اُن کو بااختیار بنانا ہے تاکہ تمام پاکستانیوں کے لیے استحکام، تحفظ اور خوشحالی حاصل کی جا سکے۔
اس پروگرام میں پاکستان کی شرکت خواتین قائدین کے لیے جاری حمایت کے سلسلہ کی بنیاد پر ہوگی اوراس سے نئے مقامی تجارتی اداروں کی تشہیر بھی ممکن ہو پائے گی۔ اس موقع پر خطاب کرتے ہوئے امریکی سفارتخانہ کے شعبہ امور عامہ کے سربراہ رے کاسٹیلو نے نوجوان پاکستانی خواتین کو ان کی کاوشوں پر خراج تحسین پیش کیا اور تاجروں کو کامیابی کے لیے درکار عزم پر روشنی ڈالی۔ انہوں نے خواتین سے مخاطب ہوکر کہا کہ نئے شروع کردہ پروگرام سے اُن کی مہارتوں اور اعتماد میں اضافہ ہوگا اور وہ اُمید کرتے ہیں کہ شرکاء اپنا کاروبار حوصلہ شکنی کرنے والے عناصر کے خیالات کے بجائے پختہ خود اعتمادی اورتجارتی ماحول میں رُونما ہوتی تبدیلیوں کے مطابق استوار کریں گی اور اپنی بہترین صلاحیتوں کو کو بروئے کار لائیں گی۔
اے ڈبلیو اِی پروگرام کے شرکاء قابل پاکستانی ماہرین تجارت کی زیر نگرانی اور رہنمائی میں ایروزونا اسٹیٹ یونیورسٹی کے شعبہ برائے بین الاقوامی انتظامی اُمور اور امریکی قدرتی وسائل کمپنی فری پورٹ میک مارن کا تیار کردہ ڈریم بلڈر پلیٹ فارم استعمال کرتے ہوئے تین ماہ پر محیط محنت طلب آن لائن کورس مکمل کریں گی۔اے ڈبلیو اِی تجارت کی خواہاں خواتین کی بنیادی معلومات میں اضافہ، سرمایہ کاری مواقع تک رسائی میں مدد، کاروباری وسعت اور تجارت میں کامیابی کے امکانات روشن کرنے کے مقصد سے ترتیب دیا گیا ہے۔
اس سلسلہ میں امریکی سفارتی مشن سے منسلک لنکن کارنرز کی لاہور، راولپنڈی، لاڑکانہ اور پشاور میں قائم شاخیں پاکستان امریکن کلچرل سینٹر اور ڈوو فاؤنڈیشن کے تعاون سے مذکورہ تربیتی پروگرام کی قیادت کریں گے جبکہ اے ڈبلیواِی پروگرام کے اختتام کے موقع پر شرکاء کو اپنے کاروبار کی وسعت کے لیے امریکی مشن کی جانب سے بنیادی سرمایہ کاری کے مسابقتی مواقع بھی میسر ہوں گے اور تربیت کی تکمیل پر وہ اے ڈبلیو اِی پروگرام کے بین الاقوامی نیٹ ورک اور امریکی تبادلہ پروگرام کی تنظیم میں بھی رُکنیت حاصل کریں گے۔
###
