رابطہ: شعبہ امور عامہ ۷ مئی، ۲۰۲۰ء
سفارتخانہ ریاست ہائے متحدہ امریکہ برائے فوری اجراء
فون:۰۵۱۲۰۱۵۴۲۷؛ ۰۵۱۲۰۱۴۴۲۳ ۰۹/۲۰۲۰ء
امریکہ کا کرونا وبا کے دوران غربت میں کمی کے لئے پاکستان کے ساتھ اشتراک
اسلام آباد ( ۷ مئی ،۲۰۲۰ء) — امریکی سفیر پال جونز نے امریکی سفارتخانہ کے سوشل میڈیا پلیٹ فارم پر جاری ہونے والے ایک ویڈیو پیغام میں پاکستان میں غربت کم کرنے کے لئے امریکہ کی پاکستان کے ساتھ بڑھتی ہوئی شراکت پر اظہار خیال کیا ہے۔ انہوں نے اپنے پیغام میں کہا "میں اس بات کو اجاگر کرنا چاہوں گا کہ کس طرح ہم معاشی طورپر کمزور افراد کو کرونا وائرس کے معاشی نقصانات سے محفوظ بنارہے ہیں۔”
امریکی سفیر نے پاکستان کے احساس ایمرجنسی کیش پروگرام کی معاونت کے لئے پچاس لاکھ ڈالر کی نئی امداد اور غذائیت کی کمی کا شکار بچوں کے لئے تیار شدہ ۳۳۶ میٹرک ٹن شفا بخش خوراک پروگرام کا اعلان کیا۔ کرونا وائرس سے متعلق معاونت کے لئے پاکستان کو ترجیحی ملک قرار دیئے جانے سے لیکر اب تک امریکہ نے قریباً ڈیڑھ کروڑ ڈالر کے فنڈز کی فراہمی کا عزم کیا ہے۔ ان تمام امدادی عطیات کی ضرورت کی نشاندہی پاکستانی حکام کی جانب سے اولین ترجیح کے طور پر کی گئی تھی، جن کے لئے امریکی عوام رقوم فراہم کررہے ہیں۔
اپنے پیغام میں امریکی سفیر نے امریکی شہریوں کے لئے پاکستانیوں کی جانب سے ہمدردی اور مدد کے اظہار کو سراہتے ہوئے کہا کہ امریکی عوام بھی ایسے ہی خلوص کے ساتھ کرونا وائرس سے متاثرہ پاکستانی شہریوں سے ہمدردی اور لگن کا اظہار کرتے ہیں۔
امریکی سفیر پال جونز کا مکمل پیغام اردو ترجمہ کے ساتھ ،میڈیا کے لئے مختصر جھلکیاں اور تصاویر درج ذیل لنک سے ڈاؤن لوڈ کی جاسکتی ہیں:
انگریزی اور اردو زبانوں میں مکمل متون اس پریس ریلیز کے ساتھ منسلک ہیں۔
###
