ہرسال پاکستان میں ہزاروں خواتین اور نومولود بچے حمل اور پیدائش کے دوران پیچیدگیوں سے موت کے منہ میں چلے جاتے ہیں۔ حمل کے دوران خطرے کی علامات کی نشاندہی اور تربیت یافتہ عملے کی موجودگی کے ذریعے ان اموات کو بہت حد تک روکا جاسکتا ہے۔
امریکی ادارہ برائے بین الاقوامی ترقی (USAID) دو ٹی وی اشتہارات، معلوماتی مواد اور تصویری کتابچے کے ذریعے ماؤں کو حمل اور بچے کی پیدائش کے دوران احتیاطی تدابیر کے بارے میں آگاہی فراہم کر رہا ہے۔ اس موقع پر منعقد ہونے والی تقریب سے خطاب کرتے ہوئے کراچی میں متعین امریکی قونصل جنرل برائن ہیتھ نے کہا کہ اگر خواتین اور ان کے اہلخانہ کو غذائیت، حفاظتی ٹیکوں، اور احتیاطی تدابیر کے بارے میں آگاہی فراہم کی جائے تو زچگی اور نوزائیدہ بچوں کی اموات کو کافی حد تک روکا جا سکتا ہے۔
امریکی قونصل جنرل نے مزید کہا کہ سینٹر فار کمیونیکیشن پروگرامز (CCP) اور امریکا کی جان ہاپکنز یونیورسٹی کے ساتھ جڑا ادارہ جھیپیگو ان مقاصد کے حصول کے لیے USAID کے زچہ و بچہ کی صحت کے پروگرام کیلیے حکومتِ سندھ کے ساتھ مل کر کام کر رہا ہے۔
وزیر صحت سندھ جام مہتاب ڈاہر نے امریکی حکومت کی جانب سے فراہم کیے جانے والے تعاون پر شکریہ ادا کیا۔ ان کا کہنا تھا کہ USAID کا ماں اور بچے کی صحت کا پروگرام سندھ میں زچہ و بچہ کی صحت کی خدمات کو بہتر بنانے میں اہم کردار رہا ہے۔
تقریب میں سیکریٹری محکمہ بہبودِ آبادی سلیم رضا، سیکرٹری محکمہ صحت سندھ سعید مگنیجو، CCP پروگرام کے سربراہ شعیب خان، کنٹری ڈائریکٹر جھیپگو فرید مدحت اور USAID اور سندھ حکومت کے اعلیٰ حکام نے شرکت کی۔
